ஆசிரியர்: ‘இலக்கணம்’ என்றாலும், ‘இயல்பு’ என்றாலும் ஒன்றே. ஒவ்வொரு பொருளுக்கும், பொதுவியல்பு, சிறப்பியல்பு என இரண்டு இயல்புகள் உள்ளது. இந்தப் பொது-சிறப்பு இயல்புகள், அளவையிலில் கூறிய பொது சிறப்பு இயல்புகள் அல்ல.
அளவியலில் ‘பல பொருள்களுக்குப் பொதுவாய் உள்ள இயல்பு பொதுவியல்பு’ என்றும், ‘ஒரு பொருளுக்குமட்டும் சிறப்பாய் உள்ள இயல்பு சிறப்பியல்பு’ என்றும் முன்னர் சொல்லப்பட்டன. இனி சித்தாந்தத்துள் ‘ஒரு பொருளுக்கு அதன் தன்மையிலே இயல்பாய் என்றும் உள்ள இயல்பு சிறப்பியல்பு என்றும், மற்றொரு பொருளின் சார்பு காரணமாக ஒரு பொருள் உண்டாகி அச்சார்பு நீங்கிய உடன் அதன் தன்மை வந்துவிடும் இயல்பு பொதுவியல்பு’ என்றும் சொல்லப்படும்.
இவ்விரண்டு இயல்புகளும் முறையே, ‘சொரூப இலக்கணம்’ என்றும், ‘தடத்த இலக்கணம்’ என்றும் சொல்லப்படும். ஆகவே, சித்தாந்தத்துள் சொல்லப்படும் சிறப்பியல்பு, பொதுவியல்பு என்பது வேறுபட்டவை.
மாணவன்: நல்லதொரு விளக்கத்தை தந்தீர்கள். முப்பொருள்களின் சொரூப இலக்கணம் மற்றும் தடத்த இலக்கணங்களை விளக்க வேண்டும்.
ஆசிரியர்: பதி, பசு, பாசம் என்னும் முப்பொருள்களுள் பதி, ஏனைய எல்லாவற்றிலும் பேராற்றல் வாய்ந்தது. அதனால் அது ‘தன்வயம்’ (சுதந்திரம்) உடையது. பசுவும் பாசமும் சுதந்திரம் இன்றி பதியின் விருப்பப்படியே செயற்படும்.
பசுவும் பாசமும் மற்றொன்றின் சார்பினால் மாறுபடும். ஆனால் பதி எந்தச் சார்பாலும் மாறாது என்றும் ஒரே தன்மையாய் இருக்கும். இதனால் பதி ‘சத்’ என்றும், ‘மெய்ப் பொருள்’ என்றும் அழைக்கப்படுகிறது.
(அ) பதியின் தன்னியல்புபதியின் சொரூப இலக்கணங்கள்:
1. ஒன்றே யாய் இருத்தல் (ஏகமாய் இருத்தல்)
2. காலம், இடம் ஆகியவற்றால் கட்டுப்படாமை (அகண்டிதம்)
3. அசைவு இன்மை (அசலம்)
4. காட்சி, கருத்து, சொல் ஆகியவற்றிற்கு அப்பாற்பட்டது
மேலும் ‘சத்து, சித்து, ஆனந்தம்’ என வைதிக சமயங்கள் கூறும். சைவாகமங்கள் இதனை எண்குணங்களாக விளக்குகின்றன:
தன்வயம், தூயஉடம்பு, இயற்கையுணர்வு, முற்றும் உணர்தல், பாச நீக்கம், முடிவிலா ஆற்றல், பேரருள், வரம்பிலா இன்பம்.
(ஆ) பதியின் பொதுவியல்புமாணவன்: பதியின் சிறப்பியல்புகளை அறிந்தேன். இனி அதன் பொது இயல்பினைத் தெரிவிக்க வேண்டும்.
ஆசிரியர்: பரசிவம் தன்னிலையிலிருந்து உலகத்தை நோக்கும் போது, உயிர்களின் நலனுக்காக பல நிலைகளை ஏற்கின்றது. அவையே தடத்த இலக்கணங்கள்.
இவை அனைத்தும் சத்தியின் செயலால் நிகழ்வதால், பதி சொரூப நிலையில் ‘சிவம்’ என்றும், தடத்த நிலையில் ‘சத்தி’ என்றும் கூறப்படும்.
சொரூப நிலையில் ஒன்று; தடத்த நிலையில் சிவம்-சத்தி என இரண்டாக இயங்குகின்றது.
(இ) பதியின் தடத்த நிலைகள்மாணவன்: தடத்தம் பல நிலைகள் உடையது என்றீர்கள். சிலவற்றைக் கூறுங்கள்.
ஆசிரியர்: பதியின் சக்தி மூலம் பல நிலைகள் உண்டாகின்றன:
பராசக்தி, ஆதிசக்தி, இச்சாசக்தி, ஞானசக்தி, கிரியாசக்தி – இவை பஞ்சசக்திகள்.
இவற்றின் செயல்பாட்டின்படி பதியின் நிலைகள்:
• சிவம் – ஞானசக்தி மட்டும்
• சத்தி – கிரியாசக்தி மட்டும்
• சதாசிவம் – இரண்டும் சேர்ந்து
• மகேசுவரன் – கிரியா அதிகம்
• வித்தை – ஞானம் அதிகம்
இதன் கீழ் உருத்திரன், மால், அயன் ஆகிய நிலைகளும் உள்ளன.
ஒரே இறைவன் ஐவராகி, படைத்தல், காத்தல், அழித்தல், மறைத்தல், அருள் ஆகிய ஐந்தொழில்களை செய்கிறான்.
இவை வடமொழியில் ‘சிருஷ்டி, ஸ்திதி, சங்காரம், திரோபவம், அனுக்கிரகம்’ எனப்படும்.
சொரூப நிலையில் இறைவனுக்கு உருவம், தொழில், பெயர் இல்லை. ஆனால் தடத்த நிலையில் உயிர்களுக்காக பல உருவங்களும் பெயர்களும் உடையவனாகிறார்.
இதனை மணிவாசகர் கூறுவது:
“ஒருநாமம் ஓருருவம் ஒன்றும் இல்லாற்கு ஆயிரம் திருநாமம்...”
எனவே, இத்தடத்த நிலைகள் வெறும் கற்பனை அல்ல; அவை உண்மையானவை என்பதை உணர வேண்டும்.
கட்டுரையாளர்கள்: ஆசிரியர் குழு
0 comments:
Post a Comment